في التفاصيل، تحدث الوسوف عن الاتصال الأخير بينه وبين ابنه الراحل قائلاً: "صحيت من النوم قالولي وديع راح المستشفى بدو يشوف الحكيم ويرجع. كلمته قالي. نص ساعة بكون بالبيت، وهي هالنص ساعة.. رحت عالمستشفى غايب عن الوعي، شفته بعيني انه مات قبل ما يقولوا مات"، أضاف جورج بغصة وقد أنهى عبارته بـ"الله يرحمه".

وعن فكرة الإعتزال، قال: "أنا لا أكفر بنعم الله التي أعطاني ياها.. الله خلقني وأعطاني الموهبة من شان فرّح الناس وأسعدهم وغنيلهم.. طول ما أنا عم باخد نفس رح ضلني غني".

وخلال سياق الحلقة، سأل العلياني ضيفه عمّا لو التقى الفنانة أصالة نصري في كواليس حفل "تريو نايت" فأكّد على أنه لم يراها وأنه تجاوز الخلاف القديم بينهما ووصفها بالفنانة العظيمة، إذ قال: "أقسم بالله ما شفتها، حتى ما انتبهت ليه ما غنت معي عالمسرح.. جيت دغري قعدت 5 دقايق عالمسرح وما شفت حدا ونزلت من المسرح عالسيارة"، وأكد أنه سيسلم عليها، وتابع: "ما طلعت بوجهي أكيد بسلم عليها، حبيبة قلبي، ما في شي بيني وبينها. بيوم أنا كنت قاسي عليها شوي، كان كلامي شوي قاسي وهي كانت أذوق من الذوق معي، جاوبتني بكل لطافة وبكل إحساس حلو وقالت هيدا صديق أبوي، شو ما حكي بمون".
وأوضح: "أنا حكيت بمحبة وهي بتعرف هالشي.. لما مات وديع الله يرحمه تلفنت وعزتني وحكيتها أنا واتشكرتها.. أصالة بنت بلدي الأم وهي فنانة عظيمة".

وفيما خص رأيه في لجان تحكيم برامج الهواة، لم يتراجع جورج وسوف عن كلامه بحق لجنة تحكيم "ذا فويس" وتحديداً نانسي عجرم وإليسا وأحلام وشيرين بأنهن لا يستحققن التواجد كأعضاء لجنة تحكيم، وقال: "أبداً ما قسيت. لجنة الحكم الي بدها تقيم شباب طالعة بدهم يصيروا فنانين، بدهم يكونوا ناس أكاديميين، بكونوا أكبر مني بكتير ومخضرمة بتعرف باللحن والمقامات.. الي ذكرتهن على راسي كلهن فنانات حلوين وشقوا طريقهن بشكل كتير حلو وعندهن أرشيف كتير حلو وعندهن جمهور لا يُستهان به".